其實就咁睇個名都唔係太期待, 尤其佢以退休後晚年生活為題材, 感覺上會有D悶, 不過以七位影帝影后作賣點, 倒係期待下既.
搵埋老公一齊去睇, 其實都驚佢睇到訓著, 下過好彩無.
套戲本身都唔錯, 雖然當中穿插左D印度門戶高低之見, 長輩從中作梗, 然後雨過天清大團圓既老套情節, 不過整體尚算OK. 我特別鐘意戲裏面既觀點, 人應該勇於嘗試, 總會有轉機, 原地踏步只會停滯不前.
片中不乏笑料, 出櫃既退休法官, 喪夫後打算自力更生的寡婦, 嚴重種族歧視既退休女管家, 副身家借哂俾個女既退休公務員夫婦, 不甘寂寞想証明自己魅力既老年男女各一, 七個唔同情況既退休人士, 共同以理想退休生活既黃金花大酒店為目的地, 但事實與理想往往未必相乎, 但前路茫茫, 退亦無路既情況下, 各人開展左唔同既生活, 有人積極, 亦有人消極崩潰, 唔同既態度造就唔同既路.
不過好笑既係呢套戲令我聯想到功夫. 點解? 因為當中有一幕話阿媽阻止個仔同個普通家庭出身既女仔結婚, 突然間, 有個印度家傭出黎講廿幾三十年前都有對年青人唔理屋企人反對, 係都要一齊既故仔, 問題係個印度家傭講左成大段都無出字幕, 要等個女仔黎幫手翻譯. 我當堂想講阿鬼你講中文啦.
好唔好睇見人見志, 不過我自己就會想請媽咪去睇, 想話俾媽咪知, 唔好因為年紀大就唔去嘗試, 勇於嘗試先會發現人生新既一面.